समाचार » चीनले अनुदानमा दिने तय भएको एकपटक दुई घन्टा चार्ज गरेपछि २०० किलोमिटर चल्ने बसमा सरकारले चासो दिएन!!!

काठमाडौँ महानगरपालिकाले चीन सरकारको सहयोगमा ल्याउन लागिएको विद्युतीय बस (इ–बस) ल्याउने विषय अन्योलमा परेको छ ।

इ–बस खरिदका लागि अध्ययनको प्रक्रिया पूरा गरिसक्दासमेत सरकारले खासै वास्ता नगरेकाले काम अघि नबढेको महानगरपालिकाका सार्वजनिक निजी साझेदार शाखा प्रमुख शिव अधिकारीले जानकारी दिए ।

उनका अनुसार चीनको मोटर कम्पनी सिआरआरसिटीका चिनियाँ प्रतिनिधिले उपत्यकामा बस ल्याउनको लागि गरेको सडक अध्ययनको प्रतिवेदन समेत बुझाइसकेको छ । सुरुको समयमा जस्तो बस ल्याउने विषयको सक्रियता अहिले देखिँदैन अधिकारीले भने ।

“विद्युतीय बस ल्याउन महानगरपालिका तयार रहे पनि सरकारका तर्फबाट प्रतिक्रिया नआएकाले आलटाल भएको हो, आशा छ केही दिनमा सरकारका तर्फबाट सकारात्मक धारणा आउने छ”– अधिकारीले भने ।

चीनले नेपाललाई २० वटा बस अनुदानमा दिने तथा नेपालले १० वटा किन्नेबारे सहमति भएको थियो । सोहीअनुरुप काठमाडौँ महानगरपालिले सोहीअनुरुप काम थालेको थियो । त्यसका लागि चिनियाँ टोली नेपाली सडकको अध्ययन गरेर चीन फर्किसकेका छन् ।

चीनले अनुदानमा उपलब्ध गराउन लागेको सो विद्युतीय बस दिनमा एकपटक दुई घन्टा चार्ज गरेपछि २०० किलोमिटर चल्छ ।

चीन सरकारले सुरुमा ३५ सिट क्षमताको विद्युतीय मिनीबस सहयोगको प्रस्ताव गरेको थियो । तर महानगरपालिकाले भने कम्तीमा पनि ४० वटा सिट भएको बस माग गरेकाले सोहीअनुसारको बस दिन चीन तयार भएको छ ।

त्यस्तै चीन सरकारले एकवटा ढोका भएको बस दिने भनेकामा महानगरपालिकाले उक्लने तथा ओर्लने गरी दुईवटा ढोकासहितको कम्तीमा ११ मिटर लामो बस माग गरेको छ ।

महानगरका अनुसार ती अत्याधुनिक एवम् ठूला इ–बस साझा यातायातमार्फत सार्वजनिक सवारीका रुपमा उपत्यकामा प्रयोग गरिने बताइएको छ । चीनबाट नेपालले ३० वटा विद्युतीय बस ल्याउन लागेको हो । चीनले उपलब्ध गराउन लागेका ती बसको मूल्य रु ८० करोड लाग्ने बताइएको छ । राससhttp://newcompanyusa1.blogspot.co.il/